KURSI IRENG #7 Novel Basa Jawa Modern
.jpg)
KURSI IRENG #7 Novel Basa Jawa Modern
By Parpal Poerwanto
Taman Tembang Sastra (Wonogiri). Nalika kuwi wanita mau kasil ngrebut
pedhange salah sijining brandhal kang sajak lena. Pedhang mau enggal kasabetake
ing awake brandhal sing aran Dargo. Ngerti kancane kena sabetan pedhang,
Glampong ora nrimakake. Dhadhane wanita mau kacubles nganggo pedhang saengga
nemahi tiwas. Dhasar brandhal ora duwe rasa kamanungsan. Layon sakloron mau
banjur dilarung ana Bengawan Solo. Wong papat banjur nggoleki papan prenahe
padhepokan Giringwaja kang dumunung ana tlatah Gunung Giri.
“Mangga,
mangga Kisanak, pinarak mriki,” ature Ki Giringwaja marang tamune.
“Inggih
Bapa,” jawabe Gita Pithing banjur takon meneh, “Napa leres papan mriki niki
ingkang kaaranan Padhepokan Giringwaja?”
“Leres.
Panjenengan sedaya niki saking pundi? Wonten parigawe napa keraya-raya dhateng
mriki?”
“Inggih
sadereningipun nyuwun pangapunten bilih anggen kula sakanca dumugi ing papan
mriki mboten ndadosake sarjuning manah. Kula ingkang ngarani inggih Gita
Pithing. Dene niki sedherek-sedherek kula. Ingkang niku Glampong. Sisihipun
Nyoto tuwin Nyono.”
“Wah,
sajake mboten wonten ingkang ndadosaken kuciwa,” jawabe Ki Giringwaja. “Inggih
ndadosaken kawuningan bilih kula menika dhapur ingkang kawastanan Ki
Giringwaja.”
“O,
kula ngaturaken bekti, Ki,” ature Gita Pithing karo ngaturake kurmat kang
diiloni dening Glampong, Nyoto, lan Nyono. Gita Pithing banjur matur maneh,
“Nuwun sewu Ki Giringwaja, anggen kula sakadang karaya-raya sowan mriki niki
manawi kepareng badhe sinau wonten ing padhepokan mriki.”
“Napa
mboten salah Kisanak Gita Pithing. Awit miturut simbok bakul sinambi wara,
ingkang kondhang kaliyan nama Gita Pithing punika tutungguling brandhal ingkang
mapan ing Alas Tutupan,” ujare Ki Giringwaja sareh ananging gawe cingake Gita
Pithing sakanca. Ora ngira yen jeneng Gita Pithing brandhal Alas Tutupan kuwi
kondhange tumeka ing tlatah Gunung Giri.
“Inggih
Bapa, kula akeni bilih kula sakadang punika tilas brandhal Alas Tutupan.
Ananging ingkang nama tilas punika ateges sampun dede, ta?”
“Bab
niku kula mboten saged matur. Temtu wonten pribadhi sampeyan sami.”
“Inggih
nuwun sewu, Ki,” Glampong nyelani atur. “Manawi kula pareng badhe matur.”
“Mangga
Kisanak.”
“Yektosipun
kula sakadang niki nembe kemawon kejodheran. Awit kula katekan satunggiling
lare nem ingkang nama Truna. Wekdal semanten, kula sakanca yektosipun badhe
ngrampok tiyang punika. E, malah kula sakanca dipun ajar entek-entekan.”
“Truna
niku siswa mriki. Manawi sampeyan sadaya sami memungsuhan kaliyan Truna ateges
ugi mungsuhipun padhepokan mriki.”
“Nuwun
sewu, Ki,” selane Gita Pithing. “Kula sakanca prasapa bilih sampun tobat. Kula
sakanca badhe pados margi ingkang leres. Pangangkah kula, mugi-mugi Ki
Giringwaja kersa nampi kula sakadang supados gesang kula sakadang mboten tansah
tumindak wonten margi ingkang peteng. Kula sakanca badhe nyecep ilmu kangge
sangu gesang wonten ngalam donya tuwin akherat mangke.”
Ki
Giringwaja megeng napas landhung. Sanajan ing njeroning ati kandha lamun apa
sing diomongake tamune mau sajak ana kang nyalawadi, ananging rasa cubria mau
dikipatake.
“Ngaten
Kisanak sedaya, kula samenika sampun lengser, bab dipun tampi utawi mbotenipun
anggen sampeyan sinau wonten ing papan mriki wenangipun wonten ing Ki Murda.
Awit ingkang ngesuhi padhepokan mriki samenika inggih Ki Murda.”
0 Response to "KURSI IRENG #7 Novel Basa Jawa Modern"
Post a Comment